南投埔里，有一个已經120冬做醮的傳統，12年才舉辦一擺，規模是真大，也保留真濟民俗的儀式，埔里鎮公所嘛向文化部爭取，欲共這个做醮列做無形文化資產。

佇咧暗暗的天色下跤，做醮的祭壇妝娗甲光焱焱，這是南投縣埔里鎮，12年一擺的做醮，欲來祈求平安閣順序。

埔里的做醮到今已經有120年的歷史，每一擺攏會全鄉鎮總動員，舉辦總共五工的儀式，規模是真盛大。

除了愛先請媽祖入城，閣愛徛燈篙、放水燈，指引好兄弟來接受普渡等等，程序是真複雜。

而且佇咧做醮前後總共7工，埔里的居民攏會同齊來食素食；另外，往過宮廟若欲鬧熱，攏會共境內的鄉親收丁口錢，予逐家鬥出鬧熱的費用，這馬煞攏已經漸漸無咧收矣，毋過埔里遮猶閣有保留這項傳統的文化。

因為這個做醮已經舉辦上百冬，而且傳統猶閣保留甲真齊全，公所也已經向文化部爭取，向望會當予這个12年一擺的做醮，列入無形文化資產。