臺北市
32°
( 35° / 26° )
氣象
2021-04-21 | 公共電視

臺鐵敗馬事故後 山崎防護.監測系統成做重點

4月初2,太魯閣自強號發生敗馬意外,清理現場了後,交通部就倩土木技師去現場做安全鑑定,看磅空內面的紅毛塗壁佮山壁滲水的情形,雖罔已經通車矣,毋過山崎的監測系統,十全的安裝佮規劃,才有法度避免意外閣再發生。

全台灣包括北迴線、宜蘭線、臺東線、縱貫線、平溪線、內灣線、集集線佮南迴線,計共25搭,因為有淹水、落石、水崩山等等風險,攏列入計畫,以南迴線12搭上濟。

毋過這項列佇行政院2019年總體檢報告的計劃,原本訂2020年底完成,到今猶未做好,台鐵講因為人工智慧判讀系統的精準度,愛較久的時間測試,估計明年完成,不過邊坡監測系統鬥好,鐵路敢就安全矣?

阻擋大量塗石對做山崎落落來造成意外,有幾種工法,包括設青色這種較簡單的圍籬、鋼絲材質的攔閘網、崁規片的網仔、猶閣有用紅毛塗起的明隧道等等差別佇tsa2塗石的程度和功效,也愛評估地質狀況,毋過台灣因為工法較傳統,較慣勢用紅毛土材質的,像紐澤西護欄就是。

佇這回太魯閣號拜馬事故後,趕去現場做安全評估的朱弘家技師認為,現場若有設1層到2層,鋼絲做的防護網,閘20噸的怪手攏無問題,佇瑞士伊爾格拉本,較容易有水崩山的所在,就曾用鋼絲敆一寡有支撐力的環仔,綁做網仔,減輕、分散土石崩落的壓力,成功截一千立方公尺土石。

雖罔有技師認為,鋼絲做的防護網,本身就是綠建材,袂成做營業廢棄物,而且耐磨,阻擋力強,施工成本低,未來台灣會當考慮,不過對邊坡預警系統、風險地段的維護工課,到鐵路邊的工程施工品質,攏愛有通盤風險的評估,才通真正確保鐵路行車安全。

最新社會新聞

延伸閱讀