臺北市
23°
( 24° / 22° )
氣象
快訊

2021-03-04 | 公共電視

臺南下茄苳泰安宮媽祖 繞境有神奇豬跤消災厄

臺南後壁的下茄苳泰安宮,主神的媽祖,廟裡有全國唯一一種「神奇寶貝」,就是囥佇大廳,予信眾拜的豬跤。遮的豬跤是媽祖出巡的時陣,縛佇開路官身軀頂的;廟裡已經有13肢豬跤,上久的有54年的歷史,遮的豬跤為什麼袂爛、袂臭,咱也做伙來了解。

這一層一層排列整齊的物件,就是下茄苳泰安宮媽祖的寶貝-神奇豬跤;這是媽祖出巡遶境,縛佇前導官身軀頂的寶貝。

除了豬跤以外,媽祖婆出巡的時,普遍的前導官攏是「報馬仔」;但是泰安宮媽祖─「加苳媽」出巡的前導官,煞是號做是「破避官」。廟方表示,這是因為加苳媽是黃袍媽祖,天界神階閣較懸;「破避官」手提馬鞭,穿黃衫結白色腰裙,隨身紮豬跤、韭菜、葫蘆,開路為媽祖婆破除陣前障礙。

待到遶境圓滿,破避官所紮的豬跤就會供在泰安宮大殿。廟方表示,到今已經留有13支豬跤,歷史上久的已經囥50幾年矣;而且一般的豬跤真緊就會臭爛去,但是破避官所紮的豬跤,綴遶境行遐爾濟工,排佇大殿竟然攏毋捌腐敗。今若有需要,只要跋桮得著媽祖婆的允准,就會使免費收驚、用豬跤來消災解厄。遮的神奇豬跤,也已經變做是下茄苳泰安宮的鎮殿之寶。

最新生活新聞

延伸閱讀