臺北市
27°
( 28° / 26° )
氣象
快訊

2021-05-05 | 公共電視

調查:囡仔若愈要意網路人際 情緒恢復率愈低

根據親子雜誌上新的調查發現,9歲至15歲的囡仔內底,若是規工佇網路傳訊息,in的情緒自我恢復率會較低,嘛較無自信,若有爸母和家庭的支持陪伴,對囡仔建立自信佮排解情緒,有直接正面的影響。

少年囡仔浸佇網路社群網站,欲綴時行的話題,也走揣同學的認同感,不過佇真實社會搪著困難、失志的時陣,敢有法度佇網路揣著寄託?

親子天下和金車文教基金會,今年3月,對全台灣9歲至15歲的少年家做調查,回收1萬7千外份的問卷,發現小學高年級以後的囡仔,會揣同學講心事,袂閣揣爸母,年歲愈大,就愈倚靠同學。另外,逐工用兩點鐘佇網路開講、傳訊息的囡仔,in的情緒自我恢復率較低,比較無自信。家長對囡仔的態度,也會直接影響囡仔的自我評價。

為著避免囡仔因為情緒困擾破病,甚至自殺。特別佇疫情時代,世界上真濟囡仔攏面對愛遠距離上課,難免情緒受著影響,好的人際連結、支持系統和陪伴,幫助囡仔消敨情緒、正面發展,袂當輕視。

最新生活新聞

延伸閱讀