臺北市
11°
( 12° / 10° )
氣象
2020-12-04 | 公共電視

降罪無辜政治犯 綠島再叛亂案奪濟人性命

白色恐怖的受難者--蔡焜霖,今年90歲矣,他是頭一批佇白色恐怖時期,予人送去綠島的政治犯,做伙來看蔡焜霖先生的故事。

搜著這張佇20通歲,佇綠島的難友蔡炳紅和楊俊隆的相片,蔡焜霖1930年出世,台中清水人,1950年佇台中縣清水鎮公所做事務員,因為予政府指控參加讀冊會,判10年有期徒刑,1951年予人送去關佇綠島新生訓導處,關押期間就經歷奪走14个少年性命的綠島新生再叛亂案。

遮的予人拍死的人,1953年攏佇綠島新生訓導處服刑,當年訓導處要求著配合「一人一事良心救國運動」,寫血書擁護政府,甚至愛佇身軀頂刺「反共抗俄」和「殺朱拔毛」的政治標語,予政府用來向外界證明,監獄中的感化教育成功,蔡焜霖的難友蔡炳紅因為毋願配合,就按呢斷送青春。

60冬前的遺憾,這馬蔡焜霖想起來,心猶真痛,蔡焜霖出獄了後,對台灣推展轉型正義有期待,伊也佇318太陽花學運的時,提蔡炳紅的相片伨後輩捍衛正義。

蔡焜霖也佇2018年,促轉會和國家人權博物館成立的時,當面向蔡總統講起綠島再叛亂案的過去,也得著蔡總統親喙承諾,定著會共嚴格審查本案的人查明詳細,予遮的無辜犧牲者在天之靈會當感覺安慰。

最新政治新聞

延伸閱讀